O‘zbekiston Respublikasi Prezidenti Shavkat Mirziyoyevning Vashingtonga amalga oshirgan amaliy tashrifi O‘zbekiston-AQSh munosabatlarini sifat jihatidan yangi — chuqur strategik sheriklik darajasiga ko‘targan tarixiy voqea bo‘ldi. Tashrif dasturi o‘zida muhim geosiyosiy tashabbuslarni hamda mintaqaning uzoq muddatli ravnaqiga qaratilgan misli ko‘rilmagan iqtisodiy kelishuvlar paketini imzolashni mujassam etdi.

          Xalqaro kun tartibidagi markaziy voqea Shavkat Mirziyoyevning Donald Tramp raisligida o‘tgan «Tinchlik kengashi»ning birinchi majlisidagi ishtiroki bo‘ldi. Sammit davomida yetakchilar G‘azo sektorini qayta tiklash va mintaqaviy barqarorlikni ta’minlashning aniq mexanizmlarini muhokama qildilar. O‘zbekiston Prezidenti mamlakatimiz nizo hududida uy-joylar, maktablar va tibbiyot ob’ektlarini barpo etishga amaliy hissa qo‘shishga tayyorligini alohida ta’kidladi. Uchrashuv yakunida tomonlarning tinchlik o‘rnatish jarayonlariga sodiqligini tasdiqlovchi qo‘shma deklaratsiya imzolandi.

           Ishbilarmonlik aloqalarini mustahkamlash sohasidagi eng muhim natija — Birgalikdagi investitsiya platformasini tashkil etish to‘g‘risidagi Bitimning imzolanishi bo‘ldi. Mazkur platforma AQSh Xalqaro taraqqiyot moliya korporatsiyasi (DFC) va Eksimbanki ishtirokida ustuvor sanoat loyihalarini amalga oshirishda moliyaviy qo‘llab-quvvatlash va xatarlarni sug‘urtalashning tizimli vositasi bo‘lib xizmat qiladi. BlackRock, John Deere, Oppenheimer va Valmont Industries kabi jahon moliya va sanoat gigantlari rahbarlari ishtirok etgan kengaytirilgan biznes-dastur doirasida strategik loyihalarni amalga oshirish bo‘yicha hujjatlar to‘plamini imzolash marosimi bo‘lib o‘tdi. Ushbu kelishuvlar o‘ta muhim sektorlarni: nodir minerallarni qazib olish va energetika infratuzilmasini modernizatsiya qilishdan tortib, yuqori texnologiyali agrosanoat klasterlarini yaratish va aqlli sug‘orish tizimlarini joriy etishgacha bo‘lgan yo‘nalishlarni qamrab oladi.

           Tasdiqlangan uch yillik Iqtisodiy hamkorlik dasturi kelgusi hamkorlik uchun umumiy poydevor bo‘ldi. Tashkil etilgan investitsiya platformasi va erishilgan kelishuvlar O‘zbekistonning Markaziy Osiyoda AQShning asosiy strategik sherigi sifatidagi maqomini mustahkamlaydi hamda milliy iqtisodiyotni sifat jihatidan transformatsiya qilish uchun ilg‘or texnologiyalar va kapitalni jalb etishda yangi sahifa ochadi.