Samarqandda o‘z ishini yakunlagan YUNESKO Bosh konferensiyasining 43-sessiyasi yirik xalqaro forumning namunali tarzda tashkil etilgani uchun O‘zbekiston xalqi va Hukumatiga chuqur minnatdorchilik bildirgan murojaatni qabul qildi.

Konferensiya 30 oktabrdan 13 noyabrgacha O‘zbekiston Respublikasi Hukumatining taklifi bilan o‘tkazildi. Yakuniy hujjatda delegatlar samimiy kutib olish, mehr-oqibat bilan ko‘rsatilgan mehmondo‘stlik hamda sessiya samarali ishlashi uchun yaratilgan har tomonlama sharoitlarni alohida ta’kidladilar.

Ishtirokchilar konferensiyaning jahon sivilizatsiyasining buyuk markazlaridan biri — Samarqandda o‘tkazilgani O‘zbekistonning madaniy merosiga bo‘lgan chuqur hurmatning muhim ramzi ekanini qayd etdilar. Murojaatda barcha a’zo davlatlar, assotsiatsiyalangan a’zolar va kuzatuvchilarning to‘laqonli ishtirokini ta’minlagan yuqori darajadagi tayyorgarlik va muvofiqlashtirish ishlari e’tirof etilgan.

YUNESKO O‘zbekiston Prezidenti Shavkat Mirziyoyevga ko‘rsatgan yordami, shaxsiy e’tibori va forumdagi ishtiroki uchun samimiy minnatdorlik izhor etdi. O‘zbekiston tashkilotlari va xodimlarining fidoyiligi va professionalligi tufayli tadbirning uyg‘un va puxta o‘tkazilganini alohida ta’kidladi.

Hujjatda, shuningdek, qadimiy sivilizatsiya va boy madaniy meros yurti sifatida O‘zbekistonning delegatsiyalar o‘rtasida o‘zaro tushunishni mustahkamlash hamda YUNESKO gumanitar qadriyatlarini ilgari surishdagi muhim roli qayd etilgan.

Bosh konferensiya O‘zbekiston xalqi va Hukumatiga murojaat yo‘llab, do‘stlik, o‘zaro ishonch va O‘zbekiston hamda YUNESKO o‘rtasidagi hamkorlikning bundan buyon yanada mustahkamlanishiga ishonch ruhini alohida ta’kidladi.